උත්කර්ෂවත් විය යුත්තේ සමුගැනීම් නොව මතකයන් පමණි

එය අසිරිමත් වූ සමුගැනීමක බොදවුන බලාපොරොත්තුවක් ගැන සිතුවිලි කම්පනය මොහොතකි. ලොවක් වේගයෙන් මුසපත් කල ඒ සිනාසෙන කගවේනා ලන්ඩන් ධාවන තීරුව මත ඇද වැටී කදුලු සලන මොහොතකි. බ්‍රිතාන්‍ය ක්‍රීඩකයන්ගේ සැණකෙළි පසෙක ලා ලොවක් මවිත කල විරුවෙක්ගේ වේදනාබර ඇදවැටීම දෙස ලොවම දෙනෙත් අයා, මුව අයා බලා සිටි මොහොතකි. වෙනදා අවසාන මීටර් 20 තුළදීම ජයග්‍රහණය සමරමින් ප්‍රතිවාදී ක්‍රීඩකයන් සමග සිනහවෙමින් ප්‍රේක්ෂකාගාරයට ආචාර කරමින් ලෝක වාර්තා සමඟ නිමකල පුරාවෘත්තය රෝද පුටුවක් මත නැගී පිටියෙන් ඉවත්ව වන්නට වූ මොහොතකි. 

 ඒ කතාව දැනට එලෙසය. මේ 2015 මාර්තු මාසයේ දිනයකි.ලෝක ක්‍රිකට් වංශ කතාවේ සුපිරි විරුවා වූ දොන් බ්‍රැඩ්මන්ගේ  වාර්තා අභිබවා වාර්තා තැබීමට වරම් තිබුනද, හොඳම කලවයසේදී පිත්ත බිම තියන්නට තීරණය කල කුමාර් සංගක්කාර නම් වූ ක්‍රිකට් පුරාවෘත්තය, ලකුණු 135 ට සියලු දෙනා දැවී ගිය ලෝක කුසලාන අවසන් පූර්ව ඉනිමක 8 වන කඩුල්ල වී, මල් වරුසාවක් මැදින් පිටියෙන් ඉවත් විය.ලෝක කුසලානයක උණුහුම විදින්නට ලෝක පූජිත සංගාටත් මහේලටත් වරම් නොවීය. ඒ සමුගැනීම ද අතිශයින්ම වේදනාබර විය.

පිටිය මැද කැරකෙන ලකුණු මැෂිම, ඒකාන්තර කෝණ ගත කල මනරම් වූ cover drive පහර,කඩුල්ල පසුපසින් පන්දුවට එරෙහිව බැදි ප්‍රාකාරය,ශතකයක් අවසන නිහතමානීව ඉහළට එසවෙන පිත්ත,එංගලන්තයේ සුද්දන් පවා වර්ණනා කල ඔහුටම අනන්‍ය වූ වාග් විලාසය; මේ  සියල්ල සංගක්කාර නම් වූ ඒ අසහාය පුරාවෘත්තය අප මතකයන් තුළ සදාකාලික කරන්නට විය.

හුසේන් බෝල්ට්; ලොවක් ආදරය කල ජැමෙයිකා දූපත් වලින් මතු වූ සිනහව, ඔබේ වාර්තා ඔබම බිදලන විට ඇගිලි අහසට මුසු කර සැමරූ ජයග්‍රාහී ලීලාව, ලොව සතර දිග් භාගයෙන් පැමිණි ඡායාරූප ශිල්පීන් ඔබව කාච ගත කරද්දී ඔබ ඔවුන්ව කාච ගත ආකාරය සකල වාසී ලෝක ජනයා තව චිරාත් කාලයක් සිහිකරනු ඇත. එදා ලන්ඩන් ධාවන තීරුව මත දණ ගසා ජස්ටින් ගැට්ලින් ඔබට ආචාර කලේ යම් සේද මේ පුංචි දූපතෙන් මුහුදු සැතැපුම් ගණනාවක් එපිටින් වූ රටක උපන් ඔබට අප මෙසේ ආචාරය පුදන්නෙමු. ඒ ක්‍රීඩාවේ හැටිය.ජය පරාජයට සමුගැනීම් අදාළ නැත. අදාල වන්නේ විදදරාගැනීම් පමණි.

සමුගැනීම්  සැමවිටම fairy tale විය නොහැකිය.  වේදනාබර විය හැකිය. නමුත් චරිතයන් පුරාවෘත්තයන් වූ කල ඔවුන් ඉතිරි කල මතකයන් සදා අමරණීය ය.

එබැවින් උත්කර්ෂවත් විය යුත්තේ සමුගැනීම් නොවේ. මතකයන් පමණි.